Mohamed Navy Ibrahim
އުމުރުން އެންމެ 14 އަހަރުގެ މަރިޔަމް ކައިލީން ޝިރުހާން ވަނީ ދިވެހި ބާސްކެޓްބޯޅައިގެ ދާއިރާގައި ހުނަރުވެރިއެއްގެ ގޮތުގައި ފާހަގަވެފައެވެ. އޭނާގެ ކުޅުމުގެ ފެންވަރާއި ޤާބިލުކަމުން މީހުން ހައިރާންކުރުވައެވެ. އޮފެންސިވް ގާޑެއްގެ ގޮތުގައި ކައިލީން ވަނީ މިހާރުވެސް ބާސްކެޓްބޯޅަ ތާރީޚުގައި އޭނާގެ ނަން ލިޔެލާފައެވެ.
ކައިލީންގެ 3 ޕޮއިންޓް ޝޮޓްތަކާއި ބޯޅަ ގެއްލުވައި ނުލައި ގިނަ ވަގުތު އަތުގައި ބޭއްވުމަކީ އޭނާގެ ކުޅުމުގެ މައިގަނޑު ހުނަރުތަކެވެ. އެންމެ ރަނގަޅު 3 ޕޮއިންޓް ޝޫޓަރުންގެ ތެރެއިން އެއް ކުޅުންތެރިއެއްގެ ގޮތުގައި މަޝްހޫރުވެފައިވާ ކައިލީންގެ ޝޫޓިންގް އަކީ ޤުދުރަތީ ހުނަރެކެވެ. މީގެ އިތުރުން، އޭނާގެ ހައިރާންކުރުވަނިވި ހުނަރުތަކުގެ ސަބަބުން ޑިފެންސްތަކުގެ ތެރެއިން ފަސޭހައިން ނެއްޓި، ސްކޯރކުރުމުގެ ފުރުސަތުތައް ހޯދައެވެ.
ރާއްޖޭގެ ބާސްކެޓްބޯޅަ މައިދާނުގައި ކައިލީންގެ ހުނަރު ވަނީ މިހާރުވެސް ފާހަގަކުރެވިފައެވެ. އޭނާ ވަނީ އެލައިޓްސް އެސްސީ އަށް 2024 ވަނަ އަހަރުގެ އެން.ބީ.އެލް އަދި އެން.ބީ.ޓީ ގައި ރަނަރަޕްގެ މަޤާމު ހޯދައިދީފައެވެ. އެން.ބީ.އެލްގައި އެންމެ އުންމީދީ ކުޅުންތެރިޔާގެ އެވޯޑު ލިބި، އަދި އެންމެ މޮޅު 5 ކުޅުންތެރިންގެ ތެރޭގައި ހިމެނުމަކީ، ކައިލީންއަކީ މިހާރު ރާއްޖޭގައި އަރަމުން އަންނަ އެންމެ މޮޅު އެއް ބާސްކެޓްބޯޅަގެ ތަރިކަން ސާބިތުކޮށްދޭ ހެއްކެކެވެ.
2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި ކައިލީން ވަނީ އަންހެނުންގެ ބާސްކެޓްބޯޅައިން ދިވެހިރާއްޖެއަށް ފުރަތަމަ ފަހަރަށް ލިބުނު ބްރޯންޒް މެޑަލް ހޯދި ޓީމުގައި ހިމެނި އޭނާގެ މޮޅު ކުޅުން ބައިނަލްއަޤްވާމީ މުބާރާތްތަކުގައި ވެސް ދައްކާލާފައެވެ. އަދި 3 ވަނަ ހޮވި މެޗްގައި ރާއްޖޭގެ ޓީމު މޮޅުވި ޕޮއިންޓް ވެސް ހޯދައިދީފައި ވަނީ ކައިލީންއެވެ.
ކައިލީންގެ ހުނަރުވެރިކަމާއި، އަޒުމާއި، ޤާބިލުކަމުން، އޭނާ ވަނީ ދިވެހި ބާސްކެޓްބޯޅައިގެ މުސްތަޤްބަލް އުޖާލާކޮށް، މި ކުޅިވަރުގައި ނުފޮހެވޭނެ ފާހަގައެއް ޖެހުމަށް ތައްޔާރުވެފައެވެ. އަދި ކައިލީންއަކީ މިހާތަނަށް ރާއްޖޭގައި އުފެދުނު އެންމެ މޮޅެތި ބާސްކެޓް ބޯޅަ ކުޅުންތެރިންގެ ލިސްޓްއިން ޖާގަ ހޯދޭނެ ފަދަ އުންމީދީ ކުޅުންތެރިއެކެވެ.
