އޭއެފްސީ ޗެލެންޖް ލީގުގައި މާޒިޔާ އަށް ދަށް ނަތީޖާތަކެއް

އޭއެފްސީން މިއަހަރު އަލަށް ތައާރަފް ކުރި ސަރަހައްދީ ތިންވަނަ ޑިވިޝަން މުބާރާތުގައި ވާދަކުރި ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން، ޕޮއިންޓެއް ނުލިބި ގުރޫޕް ސްޓޭޖުން ކަޓައިފި އެވެ.

ކުވެއިތުގައި ކުރިއަށް ގެންދިޔަ ގުރޫޕް ބީގެ ފަހު މެޗުގައި މާޒިޔާ ވަނީ ރޭ ކިރްގިސްތާންގެ އަބްދީޝް-އަތަ ކަންޓް އާ ވާދަކޮށް 3-0 އިން ބަލިވެފަ އެވެ.

މި ގުރޫޕްގެ ފުރަތަމަ މެޗުގައި ތުރުކުމެނިސްތާންގެ ޗެމްޕިއަން އަރްކަޑާގް އެފްސީއާ ވާދަކޮށް މާޒިޔާ ބަލިވީ، މިޑްފީލްޑަރު ޖޮނަތަން ކަންޓިލާނާ މާޒިޔާއަށް ލީޑު ނަގާދީފައި ވަނިކޮށް 2-1 އިންނެވެ. އަދި ދެވަނަ މެޗުގައި ކުވެއިތުގެ އަލް އަރަބީއާ ދެކޮޅަށް ކުޅެ ބަލިވީ ކުރީކޮޅު ގާތްގާތުގައި ވަން ގޯލުތަކާ އެކު 2-0 އިންނެވެ.

މާޒިޔާ އަށް ޕޮއިންޓެއް ނުލިބުނު ނަމަވެސް ގުރޫޕްގައި ވާދަކުރި އަރްކަޑާގް އާއި އަލް އަރަބީ އަދި އަބްދީޝް ވެސް ވަނީ ހަ ޕޮއިންޓް ހޯދައިފަ އެވެ. އަދި ގޯލުގެ ތަފާތުން ކުރި ހޯދައިގެން ކުއާޓާ އިން ޖާގަ ހޯދީ އަރްކަޑާގް އާއި އަލް އަރަބީ އެވެ.

ދިވެހި ޕްރިމިއާ ލީގުގެ ޗެމްޕިއަންކަން ހޯދައި މާޒިޔާ، ޗެލެންޖް ލީގުން ޖާގަ ޔަގީން ކުރީ މިދިޔަ އަހަރުގެ ޑިސެމްބަރު މަހު އެވެ. އެއަށް ފަހު ރާއްޖޭގައި ސީނިއާ ކްލަބް ފުޓްބޯޅަ ސީޒަން އަދި އޮތީ ނުފެށި އެވެ.