ކްލަބް ވެމްކޯއިން ހަތަރުވަނަ ފަހަރަށް ވީއޭއެމް ކަޕް ކާމިޔާބުކޮށްފި

ވިދިވިދިގެން ހަތަރުވަނަ ފަހަރަށް ކްލަބް ވެމްކޯ އިން ވޮލީބޯލް އެސޯސިއޭޝަން ކަޕް ކާމިޔާބު ކޮށްފިއެވެ.

ވެމްކޯ އާއި ޕޮލިސް ކްލަބް ވަނީ ވޭތުވެދިޔަ ހަތަރު އަހަރުވެސް ވީއޭއެމް ކަޕްގެ އަންހެނުންގެ ޑިވިޝަންގެ ފައިނަލްގައި ވާދަކޮށްފަ އެވެ. މި ހަތަރު ފައިނަލްގައިވެސް ކާމިޔާބީ ހޯދާފައިވަނީ ކްލަބް ވެމްކޯއެވެ.

ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗުގެ ސެޓްތައް ވެމްކޯ ގެންދިޔައީ 25-19، 25-23، 13-25 އަދި 25-21 އިންނެވެ.

މުބާރާތުގެ އެންމެ މޮޅު ކުޅުންތެރިޔާގެ މަޤާމު ލިބުނީ ވެމްކޯގެ މާޖިދާއަށެވެ. މިއީ ވިދިވިދިގެން މި މަޤާމު އޭނާ ހޯދި ތިންވަނަ ފަހަރެވެ.

މުބާރާތުގެ ޑްރީމް ޓީމުގައި ހިމެނުނީ ވެމްކޯގެ މާޖިދާ، ޖޫޒާން ޒަރީރު، މާޔާ ހުސެއިން، ފައިހާ މުހައްމަދު އާއި ޕޮލިހުގެ ހައްވާ ރާޝިދާ (ހައްވަ)، މަރިޔަމް އަޒުމާ އަދި ވޮލީބޯލް ޔޫތު ނިއު ޖެނެރޭޝަންގެ އައިމިނަތު ރިޔާޝާ އެވެ.