ކެރަމް ވޯލްޑް ކަޕަށް ރާއްޖޭގެ ޓީމް އެމެރިކާ އަށް

ކެލިފޯނިއާގެ ސެން ފްރެންސިސްކޯގައި ފަށާ ހަވަނަ ކެރަމް ވޯލްޑް ކަޕްގައި ވާދަކުރުމަށް ރާއްޖޭގެ ގައުމީ ކެރަމް ޓީމު އިއްޔެ އެމެރިކާ އަށް ފުރައިފި އެވެ.

މި މަހުގެ 10-17 އަށް ބާއްވާ ކެރަމް ވޯލްޑް ކަޕްގައި ވާދަކުރާ ރާއްޖޭގެ ސްކޮޑުގައި 12 ކުޅުންތެރިން ހިމެނެ އެވެ. އެއީ ފިރިހެން ޓީމުގެ ހަތަރު މެމްބަރުންނާއި އަންހެން ޓީމުގެ ހަތަރު މެމްބަރުންގެ އިތުރުން ސްވިސް ލީގުގައި ވާދަކުރާ ހަތަރު ކުޅުންތެރިންނެވެ.

ފިރިހެން ޓީމުގެ ހަތަރު ކުޅުންތެރިންނަކީ އިސްމާއިލް އަޒްމީން، ހަސަން ނާޒިމް، މުހައްމަދު މުންތަސިރު އަދި އިބްރާހީމް ހުޖާން އަލީ އެވެ. އަންހެން ޓީމުގައި ހިމެނޭ ކުޅުންތެރިންނަކީ އާމިނަތު ނަހުފާ، އައިޝަތު ފައިނާޒް، ފާތިމަތު ރަޔާނާ އަދި އާމިނަތު ވިދާދެވެ.

ސްވިސް ލީގުގައި ވާދަކުރާ ކުޅުންތެރިންނަކީ އާމިނަތު ޝުބާ އާދަމް، ޚާތިމް ޚަލީލް، ޔަމާން އަބްދުލް ޖަލީލް އަދި އިބްރާހިމް ލިފާއު އާމިރެވެ.

އެންމެ ފަހުން 2018 ވަނަ އަހަރު ދެކުނު ކޮރެއާގައި ބޭއްވި ކެރަމް ވޯލްޑް ކަޕްގައި ރާއްޖޭން ވަނީ އަންހެން އިވެންޓުން ބްރޯންޒް މެޑަލް ހޯދައިފަ އެވެ. އަދި ޝުބާ ވަނީ އަންހެން ސިންގަލްސްގެ ގަދަ އަށް ކުޅުންތެރިންގެ ތެރޭގައި ހިމެނިފަ އެވެ. ފިރިހެން ޓީމް އިވެންޓްގެ ބްރޯންޒް މެޑަލް މެޗުގައި ރާއްޖެ ބަލިކުރީ ފްރާންސް އެވެ.

ރާއްޖޭގެ ކެރަމް ޓީމުން ވަނީ މިއަހަރު އޮތް އޭޝިއަން ކެރަމް ޗެމްޕިއަންޝިޕްސްގައި ވެސް ކާމިޔާބީތަކެއް ހޯދައިފަ އެވެ.