Sidibari
ސާބާ ކުލަބު ޗެމްޕިއަންޝިޕްގައި ޓީރެކްސް ކުޅުނު ފުރަތަމަ މެޗު ފަސޭހަކަމާއިއެކު ކާމިޔާބުކޮށްފިއެވެ.
ސާބާގެ ގައުމުތަކުގެ ލީގު ޗެމްޕިއަން ކުލަބުތަކުން ވާދަކުރާ ސާބާ ކުލަބު ޗެމްޕިއަންޝިޕް އިއްޔެ ޗެންނާއީގައި ފަށާފައިވާއިރު، ރާއްޖޭގެ ޗެމްޕިއަން ޓީރެކްސްއިން ވަނީ ފުރަތަމަ މެޗުގައި ބޫޓާންގެ ޓިމްޕޫ މެޖިކްސް އަތުން މޮޅުވެފައެވެ. މި މެޗު ޓީރެކްސް އިން ކާމިޔާބުކުރީ 71-47 އިންނެވެ.
މި މެޗުގައި ޓީރެކްސްއިން އެންމެ ބޮޑު ތަފާތެއް ދެއްކީ ފުރަތަމަ ދެ ކުއާޓާގައެވެ. މި ދެ ކުއާޓާ ނިމުނުއިރު، 33-10 އިން ބޮޑު ލީޑެއް ޓީރެކްސްއިން ނެގިއެވެ. ފަހު ދެ ކުއާޓާ ވާދަވެރިކޮށް ފެނުނު ނަމަވެސް ޓީރެކްސްއިން ވަނީ ޓީމްގެ ގިނަ ކުޅުންތެރިންތަކަކަށް ފުރަތަމަ މެޗުގައި ފުރުސަތުދީ މުހިންމު މޮޅެއް ހޯދާފައެވެ.
މި މެޗުގައި ޓީރެކްސް ޓީމަށް އެންމެ ގިނަ ޕޮއިންޓް ސްކޯކޮށްދިނީ އަށް ރީބައުންޑް ނަގައި، އަށް ސްޓީލްކޮށް 26 ޕޮއިންޓް ސްކޯކުރި ގޯރަވް ޗަންދޭލްއެވެ. ގޯރަވްގެ އިތުރުން މި މުބާރާތުގައި ޓީރެކްސްއަށް ކުޅޭ އިންޑީއާގެ އަނެއް ދެ ކުޅުންތެރިންގެ ތެރެއިން މަންދީޕް ސިންގްވެސް 23 ޕޮއިންޓް ސްކޯކޮށްދިނެވެ. ބިދޭސީ ކުޅުންތެރިންގެ އިތުރުން މި މެޗުގައި ޓީރެކްސްގެ ދިވެހި ކުޅުންތެރިންވެސް ރަނގަޅު ކުޅުމެއް ދެއްކިއެވެ.
ފުރަތަމަ ފަހަރަށް ބާއްވާ ސާބާ ކުލަބު ޗެމްޕިއަންޝިޕްގައި އިއްޔެ ކުޅުނު އަނެއް މެޗުގައި ސްރީލަންކާގެ ކޮލޮމްބޯ ބާސްކެޓްބޯޅަ ކުލަބުން ވަނީ 71-66 އިން ނޭޕާލްގެ ޗެމްޕިއަން ޓައިމްސް ކުލަބު ބަލިކޮށްފައެވެ.
މި މުބާރާތުގައި ރާއްޖޭގެ ޓީރެކްސް ކުޅޭ ދެވަނަ މެޗުގައި މިއަދު ހަވީރު ނުކުންނާނީ ކޮލޮމްބޯ ބާސްކެޓްބޯޅަ ކުލަބާ ދެކޮޅަށެވެ.
