ބަންގްލަދޭޝްއާ ކުޅެން ފަރިތަކުރާ ގައުމީ ސްކޮޑުގައި ޒުވާން މޫނުތަކެއް

ޒުވާން ގިނަ ކުޅުންތެރިންތަކަކާ އެކު ގައުމީ ފުޓްބޯޅަ ޓީމު އަންނަނީ މި މަހުގެ 13 އަދި 16 ގައި ބަންގްލަދޭޝްއާ ދެކޮޅަށް އެގައުމުގައި ރަހުމަތްތެރިކަމުގެ ދެ މެޗު ކުޅެން ތައްޔާރު ވަމުންނެވެ.

ސީނިއާ ކުޅުންތެރިންގެ އިތުރުން މިއަހަރު 17 އަހަރުން ދަށާއި 20 އަހަރުން ދަށުގެ ގައުމީ ޓީމާ އެކު ގިނަ މެޗުތަކެއް ކުޅުނު ކުޅުންތެރިން އަންނަނީ ގައުމީ ޓީމުގެ ފަރިތަކުރުންތަކުގައި ބައިވެރިވަމުންނެވެ.

އޭގެ ތެރޭގައި 20 އަހަރުން ދަށުގެ ގޯލްކީޕަރު މުހައްމަދު ޔާމީން އާއި އަހުމަދު ޖޫދް އަޝްފާގް އަދި 17 އަހަރުން ދަށުގެ މިޑްފީލްޑަރު މުހައްމަދު ޒީކް އަހުމަދު ހިމެނެ އެވެ. ޔާމީން ވަނީ މިދިޔަ އަހަރު ޕްރިމިއާ ލީގުގައި ޔުނައިޓެޑް ވިކްޓަރީގެ ގޯލު ބަލަހައްޓައިފަ އެވެ. އަދި ޒީކް ވަނީ މިދިޔަ އަހަރުގެ ލީގުގައި ކުޅުނު ކްލަބް ވެލެންސިއާ ޓީމުގައި މުހިއްމު ދައުރެއް އަދާކޮށްފަ އެވެ.

ގައުމީ ޓީމުގައި އާއްމުކޮށް ހިމެނޭ ކުޅުންތެރިންގެ އިތުރުން، އެންމެ ފަހުން މޯލްޑިވްސް ސްޕޯޓްސް އެވޯޑްސްގައި އެންމެ މޮޅު ކުޅުންތެރިޔާގެ އެވޯޑް ހޯދި އަހުމަދު ރިޒްވާން (ރިޒޭ) އާއި ސުޕަ ޔުނައިޓެޑް ސްޕޯޓްސް (ސަސް) ގެ ކެޕްޓަން މުހައްމަދު ނިޒާމް (ޕީކޭ) އާއި ޓީސީ ސްޕޯޓްސް ކްލަބްގެ އަހުމަދު މައިޝް ރަޝީދު (މާއި) ގެ އިތުރުން ދާދި ފަހުން އޮޑި ސްޕޯޓްސް ކުލަބާއި ގުޅުން ހައިސަމް ރަޝީދު (ހައި) ވެސް ހިމެނެ އެވެ.

ރާއްޖޭގެ ޓީމްގެ ފަރިތަކުރަމުން އަންނަނީ ހެޑް ކޯޗް އަލީ ޒުޒޭން އާއި އެސިސްޓެންޓް ކޯޗް އަހުމަދު ޝާކިރު (ޝާކިއްޓޭ) ގެ އިރުޝާދުގެ ދަށންނެވެ. އަދި ގޯލްކީޕަރު ޓްރޭނަރަކީ ހަސަން ހަމީދު (ޑަކޭ) އެވެ.

އަހަރަކަށް ވުރެ ގިނަ ދުވަސް ފަހުން ދިވެހި ގައުމީ ޓީމު މެޗަކަށް ތައްޔާރު ވާއިރު، އެންމެ ފަހުން ކުޅުނީ މިދިޔަ އަހަރުގެ އޮކްޓޫބަރު މަހު އޮތް ވޯލްޑް ކަޕް ކޮލިފައިންގައި ބަންގްލަދޭޝްއާ ދެކޮޅަށެވެ. ޕްލޭއޮފްގައި ބަންގްލަދޭޝް އަތުން ބަލިވީ ފަހުން ސީނިއާ ޓީމު އަދި މެޗެއް ނުކުޅެ އެވެ. އަދި މިދިޔަ ޑިސެމްބަރު މަހު ދިވެހި ޕްރިމިއާ ލީގު ނިންމާލި ފަހުން އާ ސީޒަން އަދި ވެސް ފެށިފައެއް ނުވެ އެވެ.

ގައުމީ ޓީމުގެ ގިނަ ކުޅުންތެރިން ޗެމްޕިއަން މާޒިޔާ ސްޕޯޓްސް ކްލަބަށް ނިސްބަތް ވާއިރު، މާޒިޔާ ވަނީ މިދިޔަ މަހު އޮތް އޭއެފްސީ ޗެލެންޖް ލީގުގެ ގުރޫޕް ސްޓޭޖުގެ ތިން މެޗުން ވެސް ބަލިވެފަ އެވެ.