Sidibari
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަ މޭޓްސް (އެމްއެސްއެމް) ގުޅިގެން މި މަހު 21 ގައި ދިވެހި ޔޫތު ލީގު 2024 ފަށަން ތައްޔާރު ވެއްޖެ އެވެ.
ޔޫތު ލީގުގެ 12 އަހަރުން ދަށާއި 14 އަހަރުން ދަށް އަދި 16 އަހަރުން ދަށުގެ މުބާރާތް ވެސް އެކީގައި ކުރިއަށް ގެންދަން ރާވާފައި ވަނީ ގަލޮޅު ރަސްމީ ފުޓްބޯޅަ ދަނޑާއި ހެންވޭރު ފުޓްބޯޅަ ދަނޑުގެ އިތުރުން ހުޅުމާލޭ ސްޓޭޑިއަމްގަ އެވެ.
މުބާރާތުގައި ވާދަކުރާ ޓީމުތައް ހާމަ ނުކުރި ނަމަވެސް އެފްއޭއެމުން ވަނީ މުބާރާތުގެ ޝެޑިއުލް، މީޑިއާ ގުރޫޕުގައި ހިއްސާ ކޮށްފަ އެވެ.
މި މަހުގެ 21 ވަނަ ދުވަހު ލީގުގެ 12 އަހަރުން ދަށާއި 14 އަހަރުން ދަށުގެ މުބާރާތް ފެށުމަށް ހަމަޖެހިފައި ވާއިރު، ހުރިހާ މެޗެއް ވެސް ކުޅުމަށް ހަމަޖެހިފައި ވަނީ ހެންވޭރު ދަނޑުގަ އެވެ. ނަމަވެސް އަންނަ މަހުގެ އެއްވަނަ ދުވަހު ފަށާ 16 އަހަރުން ދަށުގެ މެޗުތައް ތިން ދަނޑުގައި ވެސް ކުޅޭނެ އެވެ.
އަންނަ އަހަތުގެ ޖެނުއަރީ 11 ވަނަ ދުވަހުގެ ނިޔަލަށް 12 އަހަރުން ދަށާއި 14 އަހަރުން ދަށުގެ ލީގު ކުރިއަށް ގެންގޮސް، 16 އަހަރުން ދަށުގެ ލީގު ކުރިއަށް ދާނީ ޖެނުއަރީ 16 ގެ ނިޔަލަށެވެ.
މިދިޔަ ޑިސެމްބަރު މަހު ރާއްޖޭގެ ކްލަބް ފުޓްބޯޅަ ސީޒަން ނިންމާލި ފަހުން ސީނިއާ ކްލަބްތަކަށް އާ ސީޒަން ފެށިފައި ނުވި ނަމަވެސް، އެފްއޭއެމުން ވަނީ މިއަހަރު 19 އަހަރުން ދަށުގެ ޔޫތު ޗެމްޕިއަންޝިޕް ބާއްވައިފަ އެވެ.
