ދިވެހި ޔޫތު ލީގު ފަށައިފި

ފުޓުބޯޅަ އެސޯސިއޭޝަނާއި ‘މޯލްޑިވްސް ސޮކާ މޭޓްސް’ ގުޅިގެން އިންތިޒާމުކުރާ ‘ދިވެހި ޔޫތު ލީގު’ މިއަދު ހަވީރު ހެންވޭރު ފުޓުބޯޅަ ދަނޑުގައި ފަށައިފި އެވެ.

ތިން އުމުރުފުރާއަކަށް ބަހާލައިގެން ކުރިއަށް ގެންދަން ރާވާފައިވާ މި ލީގުގައި މިއަދު ފަށާފައިވަނީ 12 އަހަރުން ދަށާއި 14 އަހަރުން ދަށުގެ ޑިވިށަން މެޗު ތަކެވެ. މީގެ އިތުރުން ކުޅޭ 16 އަހަރުން ދަށުގެ އުމުރުފުރާ ގެ މެޗުތައް ފަށަން ތާވަލުކޮށްފައިވަނީ ޑިސެމްބަރު މަހުގެ ފުރަތަމަ ދުވަހު އެވެ.

ދެ ދަންފަޅި އަކަށް ބަހާލައިގެން ކުޅޭ މި ޔޫތު ލީގުގައި ކޮންމެ ދުވަހަކުވެސް ހަތަރު މެޗު ކުޅޭނެ އެވެ.

ދިވެހި ޔޫތު ލީގުގައި ޖުމްލަ 84 މެޗު ކުޅުމަށް ހަމަޖެހިފައިވާއިރު، ތިން އުމުރުފުރާ އެކީ 550 ކުދިން މި ލީގުގައި ބައިވެރިވެފައިވެ އެވެ. ހުރިހާ ޑިވިށަނެއްގައިވެސް ވާދަ ކުރާނީ 8 ފުޓުބޯޅަ ކުލަބުގެ ޖޫނިޔާ ޓީމުތަކެވެ. އެއީ މާޒިޔާ ސްޕޯޓްސް އެންޑް ރިކްރިއޭށަން، ކުލަބް އީގަލްސް، ވިކްޓަރީ ސްޕޯޓްސް ކުލަބް، ޓީ ސީ ސްޕޯޓްސް ކުލަބް، ޔުނައިޓެޑް ވިކްޓަރީ، ސުޕަ ޔުނައިޓެޑް ސްޕޯޓްސް، ކުލަބް ވެލެންސިޔާ އަދި ހުއްރިއްޔާ ސްޕޯޓްސް ކުލަބެވެ.

މިއަދު ފެށި 12 އަހަރުން ދަށް އަދި 14 އަހަރުންދަށުގެ ޑިވިށަންތައް ނިމޭނީ 18 ޖަނަވަރީގައެވެ. ޑިސެމްބަރުގައި ފަށާ 16 އަހަރުންދަށުގެ ޑިވިށަން މެޗުތައް ނިމޭނީ އޭގެ ދިހަ ދުވަސް ފަހުން ޖަނަވަރީ 28 ވަނަ ދުވަހު އެވެ.

އާ އަހަރާ ދިމާކޮށް ލީގުގެ ތިން ޑިވިށަން މެޗުތައްވެސް މެދުކަނޑާލަންވަނީ ތާވަލު ކޮށްފައެވެ. އެގޮތުން 12 އަހަރުން ދަށް އަދި 14 އަހަރުން ދަށް ޑިވިށަންތައް ޑިސެމްބަރު 16 އިން ޖަނަވަރީ 09 އަށް މެދުކަނޑާލާނެ އެވެ. އަދި 16 އަހަރުން ދަށުގެ ޑިވިށަން 18 ޑިސެމްބަރުން 06 ޖަނަވަރީއަށް މެދުކަނޑާލާނެ އެވެ. މި ބްރޭކަށްފަހު ކުޅެން ހަމަޖެހިފައިވާ 16 އަހަރުން ދަށުގެ މެޗުތައް ކުޅޭނީ ހެންވޭރު ދަނޑު އަދި ގޮލޮޅު ދަނޑަށް ބަހާލައިގެންނެވެ. އެއީ މިހާރު ގަލޮޅު ދަނޑުގައި ކުރިޔަށްދާ ގޯލްޑު ކަޕު އަންނަ ޑިސެމްބަރު މަހު 22 ވަނަ ދުވަހު ނިމޭނެކަމަށް ވާތީ އެވެ.

މީގެ ކުރިންއެފް.އޭ.އެމް އިން ނެރިފައިވާ ތާވަލުގައިވަނީ 16 އަހަރުން ދަށުގެ މެޗުތައް ފުރަތަމަވެސް ފަށާނީ ގަލޮޅު ދަނޑު، ހެންވޭރު ދަނޑު އަދި ހުޅުމާލޭ ދަނޑު، މި ތިން ދަނޑުގައި ކަމަށެވެ. ނަމަވެސް، ގޯލްޑް ކަޕޫގަެ ތާވަލާ ފުށޫއަރާތީ، ޔޫތުލީގުގެ ތާވަލު މިވަނީ ބަދަލުކޮށްފައެވެ.

މިދިޔަ 2023 ވަނަ އަހަރު ފުޓުބޯޅަ އެސޯސިއޭށަނުން މި އުމުރުފުރާތަކަށް އަމާޒުކޮށްގެން އެއްވެސް މުބާރާތެއް ހިންގާފައެއް ނުވެއެވެ. އެންމެ ފަހުން ޔޫތު ލީގެއް ކުޅުނީ 2022 ވަނަ އަހަރު އެވެ. އެއަހަރުގައި ކުލަބް ވެލެންސިއާ ވަނީ 14 އަހަރުން ދަށް އަދި 16 އަހަރުންދަށުގެ މުބާރާތްވެސް ކާމިޔާބުކޮށްފައެވެ. 12 އަހަރުން ދަށުގެ މުބާރާތް އެ އަހަރުގައި ކާމިޔާބު ކުރީ ސުޕަ ޔުނައިޓެޑް ސްޕޯޓްސް އެވެ.