Ali Thameem
ދިވެހި ޤައުމީ އަންހެން ވޮލީ ޓީމުން ‘ކާވާ ވުމެންސް ވޮލީބޯޅަ ޗެމްޕިއަންޝިޕު 2024’ ގެ ރިހި މެޑަލް ހޯދައިފި އެވެ.
ސޯޝަލް ސެންޓަރުގެ އިންޑޯ ހޯލުގައި ރޭ ކުޅުނު ފޯރިގަދަ ފައިނަލް މެޗުގައި ކިރްގިސްތާނާުން ރާއްޖެ ބަލިކުރީ ފަސް ސެޓަށް ކުޅެގެން، 3-2 ސެޓުންނެވެ.
ރާއްޖޭގައި ކުޅުނު މި މުބާރާތުގައި ދިވެހި ޓީމު ކުޅުނު ހުރިހާ މެޗަކަށް ވެސް ސަޕޯޓަރުން ވަނީ ސޯޝަލް ސެންޓަރު ހޯލު ފުރާލައިފަ އެވެ.
ފައިނަލް މެޗުގެ ހުރިހާ ސެޓެއްވެސް ނިމިފައިވަނީ ވާދަވެރިކޮށެވެ. މެޗުގެ ސެޓްތައް ނިމުނީ 25-17، 24-26، 25-18، 22-25 އަދި 15-9 އިންނެވެ.
ފައިނަލަށް ދަތުރުކުރަން ދިވެހި ޓީމު ވަނީ ތަޖިކިސްތާނާއި އަފްޣާނިސްތާން ފުލުފުލުގައި ބަލިކޮށްފަ އެވެ. ނަމަވެސް ލީގު ސްޓޭޖުގައި ޗެމްޕިއަން ކިރްގިސްތާނު އަތުން ބަލިވީ ސީދާ ތިން ސެޓުންނެވެ.
ފާއިތުވި ފަސް ވަރަކަށް އަހަރުތެރޭގައި ރާއްޖޭގެ ގައުމީ އަންހެން ވޮލީ ޓީމު ވަނީ ބޮޑެތި ކުރިއެރުންތައް ހޯދާފަ އެވެ. އެގޮތުން މި ނިިމިދިޔަ ކާވާ ޗެމްޕިއަންޝިޕުން މި ލިބުނު ރިހި މެޑަލް އަކީ ރާއްޖެއަށް 2019 ގެ ފަހުން ލިބުނު ތިން ވަނަ ރިހި މެޑަލް އެވެ.
މި މުބާރާތުގެ އެންމެ މޮޅު ސެޓަރުގެ މަގާމު ހޯދާފައި ވަނީ ރާއްޖޭގެ ޖޫޒާން ޒަރީރެވެ. އަދި ޝަހާ ޝާމިން ވަނީ މުބާރާތުގެ އެންމެ މޮޅު އޮޕަސިޓް ޕްލޭޔަރުގެ މަގާމު ހޯދައިފަ އެވެ.
