ރިސޯޓް ލީގު: ނޯތު މާލެ ޒޯނުގެ ޗެންޕިއަންކަން ފަސްވަނަ ފަހަރަށް ބަނޑޮހަށް

ބަނޑޮސް މޯލްޑިވްސް އިން ފައިނަލްގައި ބަރޮސް މޯލްޑިވްސް 3-1 އިން ބަލިކޮށް ރިސޯޓް ލީގް 2024 ގެ ނޯތު މާލެ ޒޯނުގެ ޗެންޕިއަންކަން ހޯދައިފި އެވެ.

ބަނޑޮސް ވަނީ ސެމީފައިނަލްގައި މުބާރާތް ބޭއްވި ވަން އެންޑް އޯންލީ ރީތިރަށް 3-1 އިން ބަލިކޮށް، އަދި ކުއާޓާ ފައިނަލްގައި ވަރު ބައި އެޓްމޮސްފިއާ ބަލިކޮށްފަ އެވެ.

ބަރޮސް ޓީމުން ފައިނަލާ ހަމައަށް ކުޅުނު އެއްމެޗު ފިޔަވައި އެހެން ހުރިހާ މެޗެއް ނިންމާލީ ބައިކޮޅަށް ގޯލެއް ވަނަ ނުދީ އެވެ. އެގޮތުން ކުއާޓާ ފައިނަލްގައި އޯގާއާޓް ރިސޯޓާ ދެކޮޅަށް ފަސޭހަ މޮޅެއް ހޯދައި، ސެމީ ފައިނަލްގައި ރިޓްޒް ކާލްޓަން މޯލްޑިވްސްއާ ދެކޮޅަށް ވަރުގަދަ ކުޅުމެއް ދެއްކިއެވެ.

ފައިނަލްގައި ބަރޮސްއިން ފުރަތަމަ ލަނޑު ޖެހި ނަމަވެސް، ބަނޑޮސް ޓީމުން ވަނީ ފަހަތުން އަރައި ތިން ގޯލު ޖަހައިފަ އެވެ.

ރިސޯޓް ލީގުގެ ކޮންމެ ޒޯނެއްގެ ޗެމްޕިއަނުން، ރިސޯޓް ސުޕަ ލީގަށް ކޮލިފައިވާނެ އެވެ.