ނައިންޓީ ޕްލަސް ގޯލްޑް ކަޕް: ގުރައިދޫ އަތުން ކުރެންދޫ މޮޅުވުމުން ހުރާ ކަޓައިފި

ނައިންޓީ ޕްލަސް ގޯލްޑް ކަޕުގައި  ކ. ގުރައިދޫ 1-0 އިން ބަލިކޮށް ޅ. ކުރެންދޫން ދެ ވަނަ ބުރުގެ ޖާގަ އެއް ހޯދައިފި އެވެ.

17 ޓީމާއިއެކު މިދިޔަ މަހުގެ 20 ވަނަ ދުވަހު ފެށި ގޯލްޑް ކަޕްގެ ގްރޫޕް ސީގެ މެޗުތައް ނިމުނުއިރު އެއްވަނައަށް ދިޔައީ ފަސް ޕޮއިންޓް ހޯދި އައްޑު ސިޓީ އެވެ. މުޅި މުބާރާތަށް ބަލާއިރު އެންމެ ވާދަވެރި ގްރޫޕުގެ ދެވަނަ ލިބުނީ ހަތަރު ޕޮއިންޓް ހޯދި ގުރައިދޫ އަށެވެ. ކުރެންދޫއަށްވެސް ހަތަރު ޕޮއިންޓް ލިބިފައިވާއިރު، ތިން ޕޮއިންޓް ލިބުނު ހުރާ ވަނީ މުބާރާތުން ކަޓާފަ އެވެ.

މިއަދު ހަވީރު ކުޅުނު މެޗުގައި ފުރަތަމަ ހާފުގައި ގުރައިދޫން ރަނގަޅު ހަމަލާތަކެއް ފޮނުވާލި އެވެ. މިގޮތުން އެޓީމުން ފޮނުވާލި ނުރައްކާތެރި ދެ ހަމަލާއެއް ކުރެންދޫގެ ބިދޭސީ ކީޕަރު ސުޖަން ޕެރޭރާ ދިފާޢުކުރި އެވެ.

މެޗުގެ ހަމައެކަނި ގޯލު ކުރެންދޫއަށް ދެވަނަ ހާފުގައި ޖަހައިދިނީ ބެލްޖިއަމް މިޑްފިލްޑަރު ޖޯޑީ ބާޓް އެވެ. ކުރެންދޫ ކުޅުންތެރިން އަރިމަތިން ނެގި ހުރަސް ކޮންޓްރޯލް ކޮށްލުމަށްފަހު ޖޯޑި ބޯޅަ ގޯލަށް ވައްދާލީ ކީޕަރަށް އެއްވެސް ފުރުސަތެއްވެސް ނުދީ އެވެ.

ގޯލްޑް ކަޕްގެ ދެވަނަ ބުރުން މިހާތަނަށް އަށް ޓީމެއް ވަނީ ޖާގަ ހޯދާފަ އެވެ. އެއީ އައްޑޫ ސިޓީ، ކ. ގުރައިދޫ، ޅ.ކުރެންދޫ، ފުވައްމުލައް ސިޓީ، ބ. އޭދަފުށި، މާލެ ސިޓީ، ރ. އަލިފުށި އަދި ތ. ތިމަރަފުއްޓެވެ.