Ansar Ibrahim
ޕާކިސްތާނުން ވަނީ 14 ވަނަ ސައުތު އޭޝިއަން ގޭމްސް ބޭއްވުމަށް ފެހި ސިގްނަލެއް ދީފަ އެވެ.
ޕާކިސްތާން އޮލިމްޕިކް ކޮމިޓީ (ޕީއޯސީ) އާއި ސަރުކާރާ ދެމެދު ފުޅާ ދާއިރާއެއްގައި މަޝްވަރާކުރުމަށްފަހު، 2022 ވަނަ އަހަރުގެ ސައުތު އޭޝިއަން އޮލިމްޕިކް ކައުންސިލްގެ ބައްދަލުވުމުގައި އުފެދުނު ތަފާތު ކަންބޮޑުވުންތަކަށް ހައްލު ހޯދައިދީ، ކުރިން 2023 ވަނަ އަހަރު ބޭއްވުމަށް ހަމަޖެހިފައިވާ މުބާރާތް ފަސްކުރަން ޖެހުނެވެ. އެގޮތުން އެންމެ ބޮޑަށް ވިސްނަމުން ދިޔަ އެއް ކަމަކީ ގޭމްސް ބޭއްވުމަށް އެކަށީގެންވާ ތަންތަން ކަނޑައެޅުމާއި ސަރުކާރާ ގުޅިގެން ބޭނުންވާ ފައިސާ ހޯދުމެވެ.
މަޝްވަރާތަކަށްފަހު، ގިނަ މެޗުތައް ބޭއްވުމަށް ހޮވާފައި ވަނީ ލާހޯރުގަ އެވެ. އަދި ގުޖްރަންވާލާ، ފައިސަލްއާބާދު އަދި އިސްލާމްއާބާދު ފަދަ ސިޓީތަކުގައި ވެސް އިވެންޓްތައް ބޭއްވުމަށް ވަނީ ރާވާފައެވެ.
އޮކްޓޯބަރު 2023 ގެ އިވެންޓަކަށް އަމާޒުކޮށްގެން އޮރިޖިނަލް ޕްލޭން އެކުލަވާލި ނަމަވެސް ޕާކިސްތާނުން ވަނީ 2024 ވަނަ އަހަރުގެ މާޗް މަހަށް ޝެޑިއުލް ކުރުމުގެ ފުރުސަތު އޮތް ކަމަށް ލަފާކޮށް، ރިވައިޒް ޓައިމްލައިނެއް ހުށަހަޅައިފައެވެ. ނަމަވެސް އިވެންޓް ބާއްވާނެ ތާރީހެއް ރަސްމީކޮށް އިއުލާނު ކުރާނީ ލޮޖިސްޓިކް އަދި އޮޕަރޭޝަނަލް ހުރިހާ ތަފްސީލެއް ފައިނަލް ކުރުމަށް ފަހުގައެވެ.
ޕާކިސްތާނުން މިހާރު އަމާޒު ހިފާފައިވަނީ 2024 ވަނަ އަހަރުގެ ފަހުކޮޅު ނުވަތަ 2025 ވަނަ އަހަރުގެ ކުރީކޮޅު ގޭމްސް ބޭއްވުމަށެވެ. އެހެން ނަމަވެސް ހީވެސް ނުކުރާ ފަދަ ގޮންޖެހުންތަކެއް ކުރިމަތިވެއްޖެ ހާލަތެއްގައި އަލްޓަނޭޓިވް ހޯސްޓެއްގެ ގޮތުގައި ކަނޑައަޅާފައި ވަނީ ބަންގްލަދޭޝް އެވެ
