Ansar Ibrahim
މިއަހަރު އޮންނަ ޕެރިސް އޮލިމްޕިކްސްގައި ދިވެހިރާއްޖޭގެ ދިދަ އުފުލާލާނެ އެތުލީޓުންނަށް ފާތިމަތު ދީމާ އަލީ އާއި އިބާދުﷲ އާދަމް ހަމަޖައްސައިފި އެވެ.
އިބާދުﷲ ވަނީ ރާއްޖޭގެ އެތްލެޓިކްސް އެސޯސިއޭޝަނުން އޮލިމްޕިކްސްގައި ބައިވެރިވުމަށް ދޭ ޔުނިވާސަލިޓީ ސްލޮޓް ޔަގީން ކޮށްފަ އެވެ.
އުމުރުން 15 އަހަރުގެ ދީމާ އަކީ އޮލިމްޕިކްސްގެ ތާރީހުގައި ދިވެހިރާއްޖޭގެ ދިދަ އުފުލާލާނެ އެންމެ ހަގު އެތުލީޓެވެ. އަދި އޭނާއަކީ އަކީ އޮލިމްޕިކްސް އަށް ކޮލިފައިވި ފުރަތަމަ ދިވެހި ކުޅުންތެރިޔާވެސް މެއެވެ.
މި އަހަރުގެ އޮލިމްޕިކްސްގައި ދީމާ އާއި އިބާދުﷲ ގެ އިތުރުން ރާއްޖޭން ދެން ވާދަކުރާނީ ބެޑްމިންޓަން ކުޅުންތެރިޔާ ފާތިމަތު ނަބާހާ އަބްދުއްރައްޒާގާއި ފެތުންތެރިން ކަމަށްވާ މުހައްމަދު އާން ހުސެއިން އާއި އައިޝަތު އުލްޔާ ޝާއިގް އެވެ.
މިއީ ފިރިހެން އަދި އަންހެން ދެ ޖިންސުގެ ފްލެގް ބެއަރާސް ބައިވެރިވާ ގޮތަށް ބާއްވާ ދެވަނަ އޮލިމްޕިކްސް އެވެ. އެންމެ ފަހުން އޮތް އޮލިމްޕިކސް 2020 ގައި ރާއްޖޭގެ ދިދަ އުފުލާލީ ނަބާހާ އާއި ފެތުންތެރިޔާ މުބާލް އައްޒާމް އިބްރާހިމް އެވެ.
