Ansar Ibrahim
ދިވެހިރާއްޖޭގެ ހުރިހާ ސަރަޙައްދެއް ހިމެނޭގޮތަށް ގައުމީ ވޮލީބޯޅަ ލީގެއް އުފެއްދުމުގެ މަސައްކަތް ފެށިފައިވާ ކަމަށް ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުޙައްމަދު ލަތީފް ވިދާޅުވެއްޖެއެވެ.
ލަތީފް ވިދާޅުވީ ވީއޭއެމްއާ، އިންޑިއާގެ ކުޅިވަރު މާކެޓިންގ ކުންފުންޏެއް ކަމަށްވާ ބޭސްލައިން ވެންޗާސްއާ ގުޅިގެން މަސައްކަތްތައް ފަށާފައިވާ ކަމަށެވެ.
ވޭތުވެދިޔަ 10 އަހަރުގެ ތެރޭގައި ބޭސްލައިން ވެންޗަރސް ވަނީ އިންޑިއާގެ އެކި ކުޅިވަރުތަކުގެ ޑިޖިޓަލް މާކެޓިން ދާއިރާގައި މުހިންމު ދައުރެއް އަދާކޮށްފައެވެ. މި ކުންފުނިން ވަނީ 2021 ވަނަ އަހަރު ޕްރައިމް ވޮލީބޯޅަ ލީގު އުފައްދާފައެވެ. ފްރެންޗައިޒް އުސޫލުން ހިންގާ މި ލީގު މިހާރު ވަނީ ތިންވަނަ ސީޒަނުގައެވެ. މި ލީގަކީ މާލީ ގޮތުންނާއި މުޖުތަމައުގެ ބައިވެރިވުމުގެ ގޮތުން ކާމިޔާބު ވެފައިވާ ލީގެކެވެ. މިހާރު މި ލީގުގެ އަގު އަންދާޒާ ކުރެވެނީ 90 މިލިއަން ޑޮލަރު ކަމުގައެވެ.
ވީއޭއެމްގެ އަލަށް އިންތިހާބުވި ރައީސް ވަނީ އިންޑިއާގެ ވޮލީބޯޅަ ލީގަކީ އޭޝިއާގެ އެންމެ ވަރުގަދަ ޑޮމެސްޓިކް ލީގުތަކުގެ ތެރެއިން އެއް ލީގު ކަމުގައި ސިފަކުރައްވާފައެވެ. އޭނާ ވަނީ މި ލީގުގެ ކޮންސެޕްޓް އެކުލަވާލުމުގައި ބޭސްލައިން ވެންޗަރސްގެ މުހިންމު ދައުރު ވެސް ފާހަގަކުރައްވާފައެވެ. އިންޑިއާގައި އެ ކުންފުނިން މަސައްކަތްކުރި ފަދައިން އަލަށް ރާވާ ދިވެހި ލީގު ކުރިއެރުވުމަށް ލަތީފް އެ ކުންފުންޏަށް އިތުބާރުކުރައްވައެވެ.
މުޅި ދިވެހިރާއްޖޭގެ ސަޕޯޓަރުންނަށް އަމާޒުކުރެވިފައިވާ ލީގެއް އެކުލަވާލުމަށް ބޭސްލައިން ވެންޗާސްއާއެކު މަސައްކަތު ގްރޫޕެއް ވަނީ އުފައްދާފައެވެ. މި ގޮތުން އައު ވޮލީބޯޅަ ލީގު ވީހާވެސް ބޮޑަށް ދިވެހިރާއްޖޭގެ އެކި ކަންކޮޅުތަކާ ގުޅުވާލުމަށް ވަނީ ރޭވިފައެވެ.
މިކަމުގެ މަޝްވަރާތައް ކުރިއަށްދާނެކަމަށް ލަފާކުރެވެނީ ޖުލައި މަހާ ހަމައަށެވެ. އޭގެ ފަހުން ލީގުގެ ބްރޭންޑިން ހަދައި ރަސްމީކޮށް އިއުލާނުކުރެވޭނެއެވެ.
ޓެމިލް ނާޑޫ ވޮލީބޯލް އެސޯސިއޭޝަނާ އެކު ވެސް މަޝްވަރާތައް ކުރިއަށް ދާއިރު، ލަތީފް ވިދާޅުވީ ރަސްމީކޮށް އަދި އެއްބަސްވުމަކަށް އައިސްފައި ނުވާ ކަމަށެވެ.ނަމަވެސް ވީއޭއެމް އާއި ޓެމިލް ނާޑޫގެ ވޮލީބޯލް އެސޯސިއޭޝަނާ ދެމެދު ކުރިއަށް ގެންދާ މަޝްވަރާތަކުގެ ތެރެއިން އެކްސްޗޭންޖް ޕްރޮގްރާމްތައް ހޯދުމުގެ މަސައްކަތް ދަނީ ކުރަމުންނެވެ.
