ފާތިމަތު ރިޝްމާ: ދިވެހި ބާސްކެޓްބޯޅައިގައި ފަނޑު ނުވާނެ ތަރިއެއް

ދިވެހިރާއްޖޭގެ އަންހެނުންގެ ބާސްކެޓްބޯޅަ މައިދާނުގައި އާ ހާރިގައެއް ޤާއިމުކޮށް، ފާތިމަތު ރިޝްމާ ވަނީ މި ކުޅިވަރުގެ ތާރީޚުގައި އޭނާގެ ނަން ރަން އަކުރުން ފަވާލާފައެވެ. 2024 ވަނަ އަހަރުގެ ނޭޝަނަލް ބާސްކެޓްބޯޅަ ލީގު (އެންބީއެލް) ގައި ދެއްކި ތަފާތު މޮޅު ކުޅުމާއެކު، ރިޝްމާ ވަނީ “އެންމެ މޮޅު ކުޅުންތެރިޔާ” ގެ މަޤާމު ހޯދައި، ކުރިއަށް އޮތް ޖީލުތަކަށް އިންސްޕިރޭޝަނަކަށްވެފައެވެ.

މި އަހަރުގެ އެންބީއެލްގައި ރިޝްމާ ވަނީ މެޗަކަށް އެވްރެޖްކޮށް 17 ޕޮއިންޓް، 19 ރީބައުންޑް، އަދި 4 އެސިސްޓް ހޯދައި، ކޯޓުގައި އާދަޔާ ޚިލާފު މޮޅު ކުޅުމެއް ދައްކުވައިދީފައެވެ. އޭނާގެ ހުނަރުވެރިކަން ފެނިގެންދަނީ ހަމައެކަނި ޕެއިންޓްގެތެރެއިންއެއް ނޫނެވެ. 3 ޕޮއިންޓް އޭރިއާ ބޭރުން ޕޮއިންޓް ހޯދުމުގެ ޤާބިލުކަމާއި، ހައި އަދި ލޯ ޕޯސްޓުގައި ފުރިހަމަ ހިއްވަރާއި އެކު ކުޅުމާއި، މެދުތެރެއިން ޖަމްޕަރ ޖެހުމާއި، ރިންގު ކައިރިން ފުރިހަމަ ނިންމާލުމުގެ ހުނަރު ހުރުމަކީ ރިޝްމާގެ ތަފާތުކަން ސާބިތުކޮށްދޭ ފުރިހަމަ ހެކިތަކެކެވެ.

2024 ވަނަ އަހަރުގެ ނޭޝަނަލް ބާސްކެޓްބޯޅަ މުބާރާތް (އެންބީޓީ) ގެ ފައިނަލްގައި ރިޝްމާ ވަނީ ބާސްކެޓްބޯޅަ ތާރީޚުގެ ރެކޯޑުތަކުގައި އޭނާގެ ނަން ލިޔެލާފައެވެ. މި މެޗުގައި 29 ޕޮއިންޓާއި 22 ރީބައުންޑް ހޯދައި، އޭނާގެ ޓީމު ކާމިޔާބީއާއި ހަމައަށް ގެންގޮސް، އޭނާގެ ފުރިހަމަ ހުނަރުވެރިކަމާއި ވަރުގަދަކަން ދައްކުވައިދީފައިވެއެވެ.

ރިޝްމާގެ އެންމެ ފާހަގަކޮށްލެވޭ ސިފައަކީ އޭނާގެ ޚާއްޞަ ބާސްކެޓްބޯޅަ އައިކިއުއެވެ. ވަރަށް ފަސޭހަކަމާއިއެކު ކުޅުންތައް ދެނެގަނެ، ސިކުންތުކޮޅެއްގެ ތެރޭގައި ނިންމުންތައް ނިންމައި، ބަލަން ތިބޭ މީހުން ހައިރާންކުރުވައެވެ. މި ހުނަރުވެރިކަމާއެކު، ރިޝްމާ ވަނީ ބާސްކެޓްބޯޅަ ތާރީޚުގައި އަބަދުގެ އަބަދަށް އޭނާގެ ނަން ފަވާލާފައެވެ.

ރިޝްމާއަކީ ދިވެހިރާއްޖޭގެ ބާސްކެޓްބޯޅަ ތާރީޚުގައި މިހާތަނަށް ފެނިފައިނުވާ ފެންވަރުގެ ކުޅުންތެރިއެކެވެ. އޭނާގެ ހުނަރާއި ވިސްނުންތެރިކަމަކީ އަޅުގަނޑުމެން އެންމެންނަށްވެސް އިންސްޕިރޭޝަނެކެވެ. ރިޝްމާ ވަނީ ދިވެހި އަންހެން ކުދިންނަށް ބާސްކެޓްބޯޅައިގައި ކުރިއެރުމުގެ އައު ދޮރެއް ހުޅުވާލައިދީފައެވެ.

އޭނާގެ ލީޑަރޝިޕާއި ހިތްވަރަކީ އަޅުގަނޑުމެން އެންމެންނަށްވެސް ފާހަގަކުރެވޭ ކަމެކެވެ. ރިޝްމާ ވަނީ ދިވެހި ބާސްކެޓްބޯޅައިގެ ފެންވަރު މުޅިން އައު ހަރުފަތަކަށް ގެންގޮސްދީފައެވެ. ރިޝްމާގެ ކާމިޔާބީތަކަކީ މުޅި ޤައުމަށް ލިބިގެންދިޔަ ފަޚުރެކެވެ. އޭނާގެ ކުޅުމާއި އަޚްލާޤަކީ ހުރިހާ ޒުވާނުންނަށްވެސް ރަނގަޅު މިސާލެކެވެ.

ފާތިމަތު ރިޝްމާގެ މި ކާމިޔާބީތަކާއެކު، ދިވެހިރާއްޖޭގެ އަންހެނުންގެ ބާސްކެޓްބޯޅައިގެ މުސްތަޤުބަލު ވަރަށް އުޖާލާކަމަށް ފެނެއެވެ. އޭނާގެ ހުނަރާއި ކުޅުމުގެ ފެންވަރު ވަނީ ޤައުމީ އަދި ބައިނަލްއަޤްވާމީ ފެންވަރުގައިވެސް ސަމާލުކަން ހޯދައިދީފައެވެ. ރިޝްމާގެ މި ކާމިޔާބީތަކަކީ ދިވެހި އަންހެން ކުދިންނަށް ބާސްކެޓްބޯޅައިގައި ކުރިއަށް ދިއުމަށް ލިބުނު ބޮޑު ހިތްވަރަކަށް ވެގެން ދާނެކަން ޔަޤީނެވެ.