Ansar Ibrahim
މިއަހަރުގެ އައްޑޫ ފުޓްބޯޅަ ޗެމްޕިއަންޝިޕްގެ ފައިނަލް މެޗުގައި ޕެނަލްޓީ ޝޫޓްއައުޓުގައި 4 -3 އިން ފާހި އެސްސީ ބަލިކޮށް މައިލޯ ސިޓީ އެސްސީ ޗެމްޕިއަންކަން ހޯދައިފި އެވެ.
މި މެޗުގެ ފުރިހަމަ ވަގުތު ހަޖަވީ 1-1 އިން އެވަރު ވެގެންނެވެ. މި މެޗުގައި ފުރަތަމަ ގޯލު ޖަހައި ކުރި ހޯދީ މައިލޯ ސީޓީ އެސްސީ އިންނެވެ. މި ގޯލު ޖެހީ ފުރަތަމަ ހާފުގައި ޖެހީ ނާފިއުއެވެ. ދެވަނަ ހާފުގައި ފާހި އެސްސީން އެއްވަރު ކުރީ ޔޫސުފް ސިދާމް ބޮލުން ޖެހި ގޯލުންނެވެ.
ޕެނަލްޓީ ޝޫޓްއައުޓްގައި ތަފާތު ދެއްކީ މައިލޯ އެސްސީގެ ގޯލްކީޕަރު އަލީ އަޖުފާން އަމްޖަދެވެ.
އައްޑޫގެ އާ ޗެމްޕިއަނުން ފައިނަލަށް ދިޔައީ ލީގު މަރުހަލާގެ ހުރިހާ މެޗެއް ކާމިޔާބުކޮށްގެންނެވެ. އެމީހުން 32 ގޯލު ޖަހާފައިވާއިރު ބައިކޮޅަށް ވަދެފައިވަނީ އެންމެ ދެ ގޯލެވެ. މީގެ ތެރޭގައި އެމީހުންގެ ދެވަނަ ކުލަބު، ޔުނައިޓެޑް މައިލޯ ކޮޅަށް ޖެހި 17 ގޯލުވެސް ހިމެނެއެވެ. ފާހި އެސްސީ ވަނީ 3 މެޗުން 7 ޕޮއިންޓް ހޯދާފައެވެ. އަދި އެމީހުންނަށް ފައިނަލަށް ދެވުނީ ޒެފިއާ އެފްސީއަށްވުރެ ގޯލު ތަފާތުން ކުރި ހޯދައިގެންނެވެ.
View this post on Instagram
ޔުނިޓީ ފައުންޑޭޝަނާއި އައްޑޫ ސިޓީ ކައުންސިލް ގުޅިގެން އިންތިޒާމުކުރި އެމްއޭސީއެލް އައްޑޫ ޗެމްޕިއަންޝިޕް 2024 ބޭއްވުނީ ދެ ހަފްތާގެ މުއްދަތަށް އައްޑޫ ފުޓްބޯޅަ ދަނޑުގައެވެ. ޗެމްޕިއަނުން މައިލޯ ސިޓީ އެސްސީއަށް 100,000 ރުފިޔާ ލިބުނު އިރު، ރަނަރަޕް ފާހި އެސްސީއަށް 50,000 ރުފިޔާ ލިބުނެވެ.
2022 އިން ފެށިގެން މެދުކެނޑިފައިވާ އައްޑޫ ފުޓްބޯޅަ ޗެމްޕިއަންޝިޕަކީ ރާއްޖޭގެ އެންމެ ބޮޑެތި ކުލަބު ފުޓްބޯޅަ މުބާރާތްތަކުގެ ތެރެއިން އެއް މުބާރާތެވެ.
މުބާރާތުގެ ކުރީގެ ޗެމްޕިއަނުންނަކީ ފޭދޫ އެސްސީއެވެ. އެމީހުން ވަނީ ވިދިވިދިގެން ދެފަހަރު ޗެމްޕިއަންކަން ހޯދާފައެވެ. ނަމަވެސް މިއަހަރު އެމީހުން ބައިވެރިވެފައެއް ނުވެއެވެ.
