Ansar Ibrahim
ވޮލީބޯލް އެސޯސިއޭޝަނުގެ އިންތިބު އިއުލާން ކުރުމާ ގުޅިގެން ސްޕޯޓްސް ކޮމިޝަނަރު މުހައްމަދު ތޮލާލް އެކަމަށް ފާޑު ކިޔައިފިވެ.
މި އިންތިހާބު އެންމެ ފުރަތަމަ ބާއްވަން ނިންމާފައި އޮތީ މި މަހުގެ 11 ވަނަ ދުވަހު ވީއޭއެމްގެ “އެކްސްޓްރާ އޯޑިނަރީ ކޮންގްރެސް” ގައެވެ. ސްޕޯޓްސް ކައުންސިލާއި އޮލިމްޕިކް ކޮމިޓީ އަދި ސްޕޯޓްސް ކޮމިޝަނަރުގެ އޮފީހުގެ އޮބްޒާވަރުން ނެތުމުން ބޭއްވި ކޮންގްރެސް ނިންމާލީ އަންނަ މަހުގެ 19 ވާ އަންގާރަ ދުވަހު އިންތިހާބު ބާއްވަން ނިންމައިގެންނެވެ.
ވީއޭއެމްގެ ބެލެނިވެރި މުއައްސަސާ ކަމަށްވާ ކޮމިޝަނާ އޮފް ސްޕޯޓްސްގެ އޮފީހުން މީގެ ކުރިންވަނީ އޮލިމްޕިކް ކޮމިޓީ އާއި ސްޕޯޓްސް ކައުންސިލްގެ ބައެއް ޑިމާންޑްތައް ހާސިލް ނުވަނީސް އިންތިހާބު ކުރިއަށް ނުގެންދިއުމަށް އެދި އެސޯސިއޭޝަނަށް ސިޓީއެއް ފޮނުވާފަ އެވެ.
ކޮންގްރެސްގައި ބައިވެރިވުމާއި އޮބްޒާވް ކުރުމުގެ ހައްގު ލިބިފައިވާ ކްލަބްތަކުގެ ތެރޭގައި ހިމެނޭ ގިނަ ކްލަބްތަކަކީ ކެންޑިޑޭޓް މުހައްމަދު ލަތީފަށް ތާއީދުކުރާ ކްލަބްތަކެވެ. އެ ކްލަބްތައް ހާޒިރުވި އިރު، ކޮންގްރެސްގައި ތަމްސީލު ކުރަން ބޭނުންވާ ބައެއް ކްލަބްތަކަށް އެ ފުރުސަތު ނުލިބުނެވެ. ވީއޭއެމް އިން ބުނަނީ “ސްޕޯޓްސް ކްލަބް ސިޓީ” އާއި “މަލްސާ ސްޕޯޓްސް ކްލަބް” އަށް ވޯޓު ނުލެވެނީ ރަޖިސްޓްރީ ފުރިހަމަ ނުވާތީ ކަމަށެވެ.
އާ އޮޕަރޭޓިން ޕޮލިސީގެ ދަށުން އެކްސްކޯގެ އާ ނުވަ މަގާމެއް އޮވެ އެވެ. އިސްލާހުކުރެވުނު އުސޫލުގެ ދަށުން އާ ރައީސްގެ ޒައާމަތުގައި 6 ނައިބު ރައީސުން މަސައްކަތް ކުރައްވާނެއެވެ.
މުހައްމަދު ރަނޭޝްގެ ބަދަލުގައި ވާދަކުރައްވާ ހަމައެކަނި ބޭފުޅަކީ ވީއޭއެމްގެ ރައީސްކަން ކުރިން ކުރެއްވި މުހައްމަދު ލަތީފް އެވެ. އިންތިގާލީ ރައީސަކީ މަދުވެގެން މިހާރު އޮތް އެކްސްކޯގެ ފުރިހަމަ ދައުރު 2025 ވަނަ އަހަރުގެ އޭޕްރީލް މަހު ހަމަވަންދެން އެސޯސިއޭޝަނަށް ހިދުމަތް ކުރައްވާނެ ބޭފުޅެކެވެ.
